| Սևանը աշխարհի բարձրադիր լճերից ամենամեծն է և ամենամեծերի մեջ՝ ամենաբարձրադիրը: Սևանի ավազանը հարուստ է առողջարար ռեսուրսներով: Բարեխառն լեռնային կլիման, որում գերակշռում են արևոտ օրերը, լեռնային զուլալ օդը, վեհաշուք լեռներով երիզված չքնաղ բնապատկերներն ու զբոսանքները լճի վրա ձեր հանգիստը կդարձնեն լիարժեք և անմոռաց:
Բնության այս գողտրիկ անկյունում, Փոքր Սևանի վերին ափը շրջանցելով և շարժվելով դեպի հյուսիս-արևելք, ձեր առջև կհառնի "Կապուտակ Սևա"□ հանգստյան համալիրը, որը ճանապարհից առանձնանում է կանաչ գոտով:Համալիրից հրաշալի տեսարան է բացվում. ասես ափիդ մեջ շողում է շրջակա մոխրակապույտ լեռնաշղթաներով օղակված Սևանա լճի արծաթափայլ ափսեն:
"Կապուտակ Սևան" համալիրը գտնվում է լճի ամենատաք լողափում, որտեղ վահանի դեր ստանձնած լեռներն այն պատնեշում են հյուսիսային քամիներից:
Հանգստյան գոտու ամբողջ տարածքը, մինչև լողափ, պատված է սոճու և եղևնու ծառերով, որոնց հաճելի բույրը զուգակցվում է բուժիչ հատկություններով: Արևն այստեղ ջերմացնում է մինչև սեպտեմբերի վերջը: |
